Yhtheistyökaverukset
Norrbottenin maakunta oon kolmen viralisen minuriteettikielen alue: meänkielen, suomen ja saamen kielen. Region Norrbotten tykkää, ette kielet oon tähelisiä ja halvaa mielelä tukea niitä omala aluheela. Plypile se oon antanu apua jo useaman kirjan kääntämisseen.
Suomalais-ruottalainen rajaväyläkomisuuni tekkee työtä rajaväylän aluheela. Se halvaa kehittää rajan ylittävvää yhtheistyötä niin vetheen ko kulttuuhriinki liittyvissä asioissa. Komisuuni oon ollu myötä Plypin kirjaliikheissä rajaväyläpiitraakin kautta.
Syksylä 2019 Rajaväyläkomisuunila ja Palovaara oli iso kirjaliike ylemässä Tornionlaaksossa (Pajala, Övertorneå, Muonio, Kolari, Pello ja Ylitornio). Sillon kaikile ensimäisen luokan oppilhaile annethiin oma Plypin kotona -kirja. Niitä jaethiin yhteensä 200 kappaletta tukehmaan meänkielen säilymistä molemilla puolin Väylää.
Septämperissä 2022 oon tulossa samanlainen villin iso liike, jossa matkassa oon vielä ylempänä Karesuanon kylät ja alempana Tornionjoen suula Haaparannan ja Tornion kaupunkit! Hetin 600 esikoulun alkanutta kläppiä saapii Plyppi aarnimettässä -kirjan, lissää tietoa tulossa!
Kolarin kunta oon innokas järjestämhään tornionlaaksolaisia liikheitä ja tekkee mielelä yhtheistyötä esimerkiksi Pajalan kunnan kans. Kolari anto apua aivan ensimäisten Plyppi-kirjoitten kääntämisseen.
Talvela 2021 Kolarin pipliuteekki anto kaikile kunnan päivähoion kläpile Plyppi ja karhunpenikat -kirjan! Oman meänkielisen kirjan sai 100 kolarilaista kläppiä, ja se oli osa Suomen Lapin pipliuteekitten Huhuu!-kläpittenkirjafästivaalia.
