Plyppi oon alun perin ruottalainen trolli, joka ellää tunturimaisemissa Ruottin Lapissa. Plypin ruottinkielinen nimi oon Plupp ja tämän kläpittenkirjahahmon oon keksiny ruottalainen Inga Borg (1925–2017). Borg kerkisi kirjottaa 27 kirjaa Plypistä elämänsä aikana, ja niitä oon käänetty monile eri kielile: pohjossaameksi (Bluppe), inarinsaameksi (Puppâ), koltansaameksi (Tu´rrvuei´vv), eteläsaameksi (Plupp), fäärin kielele (Brúsi), kröönlanniksi (Plup), islanniksi (Plúpp), suomeksi (Pörri-peikko), norjaksi (Plopp), tanskaksi (Plup), englanniksi (Plupp), ranskaksi (Plupp), saksaksi (Plupp), esperantoksi (Plupo) ja arapiaksi. Vuona 2015 tämä kläpittenkirjaklassikkeri fiirasi 60-vuotisjypileetä ja sillon Plyppiä käänethiin ensimäistä kertaa meänkielele.

Plypin kirjoista saattaa oppia pohjosen luonosta ja vuenajoista, useasti jonku elukan näkövinkkelistä. Plyppi saattaa puhua elukoitten kansa ja hänen parhhaimat kaverit oon Kärppä ja Sopuli. Plypin tuntee sinisestä tukasta ja punasesta nokasta ja hään assuu turvekoassa Vaarajärven rannala.